طالب ذكي لكن مستفز

في امتحان الفزياء في جامعة كوبنهاجن جاء هذا السؤال
باستخدام البارومتر(جهاز قياس الضغط) كيف تقيس طول ناطحة سحاب؟!!!!

طبعا الاجابة هي قياس فرق الضغط الجوي عند قمة وقاع الناطحة وقياس فرق الضغط

لكن فيه طالب ظريييييييييييف جاوب بشكل مستفز خلي الدكتور يديله صفر ولا يصحح باقي الورقة
تخيلوا ايه الاجابة؟!!!!!!!!!!!!!!!!!!!!!!!!!!!!!!1

قال نربط البارومتر في حبل ونسقطه من فوق العمارة ونقيس طول الحبل

ههههههههههههههههه( اكيد كان شارب سيجارة بانجو قبل الامتحان)

المهم......... الدكتور عمل لجنة تحقيق للطالب وفي التحقيق سألوه نفس السؤال عشان يشوفوا يرفدوه ولا لا(طالب زي ده مينفعشي يقعد يوم واحد في جامعة عريقة بتدرس الفزياء)

الطالب قال فيه طريق كتيرة

ممكن نرمي الجهاز من فوق العمارة ونحسب زمن السقوط ومنه نحسب طول العمارة باستخدام قانون الجاذبية الارضية

وممكن لو الشمس مشرقة نقيس طول ظل العمارة وطول ظل البارومتر ونحسب طول العمارة من قانون التناسب بين الطولين والظلين

وممكن نربطه بحبل وننزله لغاية الارض ونقيس طول الحبل

وممكن بقي نريح دماغنا ونسهل علي نفسنا ونقول لحارس العمارة هديك الجهاز الحلو ده لو قلتلي العمارة دي ارتفاعها قد ايه؟!!!!!!!!!!!!

وممكن بقي نقرف نفسنا ونعقد الدنيا ونقيس الضغط الجوي عند قاع العمارة وعند القمة ونحسب فرق الضغط الجوي ونعوض في القانون ونحسب المسافة

لكن اللجنة كانت منتظرة الاجابة الاخيرة عشان تتأكد ان الطالب ده فاهم المنهج ويستحق الدراسة بالجامعة لكن الطالب كان بيعتقد انها الاسوء والاكثر تعقيدا

بقي ان نقول ان هذا الطالب هو (نيلز بور) وهو لم ينجح فقط في الامتحان ولكن كان هو الدنماركي الوحيد الذي حصل علي جائزة نوبل في الفزياء